اسلام آباد۔17مئی(اے پی پی) وفاقی وزیر توانائی انجینئر خرم دستگیر آکھیے پاکستان تکھی رفتار اقتصادی ترقی آلے پاسے ٹردا پئے ، ماحول دوست توانائی گھنݨ کیتے کوشاں ہیسے ، ماحول دوست توانائی دی ضرورت موجودہ نسل کوں پیش آندے ساریں تو اہم مسئلیں اچوں ہے ، پاکستان جیہے ملک موسمیاتی تبدیلیاں توں ساریں توں ودھ متاثر ہن تے پاکستان ݙوجھے ملکاں دی طرفوں کھنڈائی ونجݨ آلی آلودگی پاروں ضیان چیندا پئے ، اے ڳالھ انہاں یو ایس ایڈ دے زیر اہتمام بینکاک اچ تھیوݨ آلی ’’فیوچر انرجی کانفرنس ایشیا‘‘ توں خطاب کریندے ہوئیں آکھی اے ۔ خرم دستگیر آکھیے ماحول تےر مضر اثرات مرتب کرݨ آلے ایندھن کوں مرحلہ وار ختم کیتا ویسی۔ انہاں آکھیے’’نیشنل الیکٹر سٹی پالیسی 2021‘‘دا وژن مقامی وسائل کوں بروئے کار گھن آندے ہوئیں توانائی دی ضرورتاں کوں پورا کرݨا اے ، پاکستان شمسی تے ہوا توں حاصل کیتی ونجݨ آلی توانائی دی پیداوار تے خصوصی توجہ ݙیندا پئے ۔ وفاقی وزیر دا آکھݨ ہئی جو پاکستان اچ ماحول دوست توانائی دا حصہ 6 فیصد توں تجاوز کر ڳئے تے حکومت دا ہدف 2030 تئیں ماحول دوست توانائی دا حصہ60فیصد تئیں ودھاوݨا اے ۔خرم دستگیر آکھیے حکومت 2030 تئیں الیکٹرک گاݙیاں دا استعمال 30 فیصد کرݨ دا ارادہ رکھیندی اے جݙاں جو 2030 تئیں کولیں دی درآمد تے مکمل پابندی لاوݨ دا وی ارادہ رکھیندی اے ۔
