جيڪي پنهنجي ليڊر کي ڇڏرائڻ لاءِ نڪتا هئا اهي پاڻ بند ٿي ويا، انهن سياست ۾ غلط روايت وڌي: عطاءُ الله تارڙ

اسلام آباد – 10 – سيپٽمبر (اي پي پي) اطلاعات، نشريات، قومي ورثي ۽ ثقافت واري وفاقي وزير عطاءُ الله تارڙ چيو آهي ته جيڪي پنهنجي ليڊر کي ڇڏرائڻ لاءِ نڪتا هئا اهي پاڻ بند ٿي ويا، انهن سياست ۾ غلط روايت وڌي، انهن کي سمجهائيندا هئاسين ته سنڀالي هلو، نفرت جو ٻج انهن پوکيو آهي ۽ فصل به اهي ئي لُڻندا. قومي اسيمبلي جي اجلاس ۾ ڳالهائيندي اطلاعات واري وفاقي وزير چيو ته ايوان ۾ پنهنجي کاٻي پاسي سُنسان سيٽون ڏسي حيران آهيان ته ڪالهه واري واقعي کانپوءِ انهن کي ڪهڙو نانگ سُنگهي ويو جو ٽن چئن ماڻهن کانسواءِ ڪنهن به هتي اچڻ جي جرئت به نه ڪئي. هن چيو ته اسان انهن کي سمجهائيندا هئاسين ته سنڀالي هلو، ٿورو خدا جو خوف رکو. هن چيو ته ماضي ۾ حڪومتي سيٽن تان اپوزيشن کي تقريرن کان روڪيو ويندو هو، ڪسٽوڊين آف دي هائوس بدران پراڊڪشن آرڊر جاري ڪرڻ جون هدايتون وزيراعظم کان اينديون هيون ۽ پي ٽي آءِ جو باني چيئرمين ٻڌائيندو هو ته ڪنهن جو پراڊڪشن آرڊر جاري ڪرڻو آهي ۽ ڪنهن جو ناهي ڪرڻو. هن چيو ته تڏهن به انهن کي سمجهائيندا هئاسين ته وقت هڪ جهڙو ناهي رهندو، انهن سياست جي اندر غلط روايتون وڌيون، اهو ڪڏهن به ناهي ٿيو ته عورتن کي سياسي انتقام جو نشانو بڻايو وڃي. فريال ٽالپر کي عيد کان هڪ ڏينهن اڳ چنڊ جي رات اسپتال مان جيل موڪليو ويو ۽ چيو ويو ته آئون چاهيان ٿو ته ان جي ڀاءُ کي اذيت پهچي، ان جي ڀاءُ تائين پيغام وڃي ته سندس بيگناهه ڀيڻ کي اسپتال کان جيل موڪليو ويو آهي. هن چيو ته مريم نواز شريف جي هڪ ڪيس ۾ ضمانت ٿي ۽ ٻيهر ڪهڙي انداز ۾ گرفتاري ڪئي وئي؟ اهو چيو ويو ته مريم نواز کي ان جي پيءُ جي سامهون گرفتار ڪيو وڃي. وفاقي وزير چيو ته ان وقت شهباز شريف صاحب جي ڪيس جي احتساب عدالت نمبر 3 ۾ ٻڌڻي هئي، اسان عدالت ۾ پيش ٿياسين ۽ درخواست ڪئي ته شهباز شريف جي والده لاڏاڻو ڪري وئي آهي اڄ جرح نه ڪئي وڃي پر چيو ويو ته جرح هر صورت ۾ ٿيندي. شهباز شريف جي والده جي ميت گهر ۾ پيل هئي ۽ چار ڪلاڪ ڪيس جي ڪارروائي هلي. هن چيو ته ان وقت جو شهزاد اڪبر اڄ ڪٿي آهي جيڪو هتي ويهي ماڻهن جي مائرن ۽ ڀينرن جي خلاف ڪيس ٺاهيندو هو، اڄ وقت آيو آهي ته هو ملڪ ڇڏي ڀڄي ويو. هن چيو ته اهي اڄ ڪهڙي ڳالهه تي روئي رهيا آهن. انهن نه ماضي مان سبق سکيو ۽ نه ئي حال مان، انهن جو مستقبل اونداهون نظر اچي ٿو. هڪ نام نهاد وڏو وزير جلسن ۾ ادارن جي خلاف غليظ زبان استعمال ڪئي، سندس صوبي ۾ دهشتگردي وڌي رهي هئي، ڏکڻ خيبرپختونخواهه جي اندر روزانو ڌماڪا ۽ حملا ٿي رهيا آهن ۽ ان کي فڪر ئي نه آهي، هي اها ئي ڳالهه ٿي ته جڏهن روم سڙي رهيو هو ته نيرو سُک جي بانسري وڄائي رهيو هو. هتي جو نيرو ڪنٽينر تي بيهي غليظ زبان استعمال ڪري رهيو هو، ناڪام جلسي جي ڪاوڙ ڪڍي رهيو هو ته پنهنجي ماڻهن کي ڪڍي اسٽيج تي چڙهي ادارن ۽ مريم نواز شريف جي خلاف جيڪا زبان استعمال ڪئي وئي، انتهائي مذمت جوڳي آهي. هن عورت صحافين جي خلاف جيڪا زبان استعمال ڪئي، ان جي پرزور مذمت ڪريون ٿا. هن چيو ته هڪ نئين فلم تيار ڪرڻ جو سوچي رهيا آهن جنهن جو نالو ”مين لاهور نهين جائونگا“ هوندو ڇو ته هاڻي منهنجو خيال آهي ته اهي لاهور وڃڻ جو ارادو ختم ڪري ڇڏيندا. هن چيو ته اها چڙهائي ڪهڙي ڳالهه تي آهي، انهن جي ساڍا 12 سالن کان خيبرپختونخواهه ۾ حڪومت آهي، هاڻي خيبرپختونخواهه ۾ پي ڪي ايل آءِ ۽ راولپنڊي انسٽيٽيوٽ آف ڪارڊيالاجي جهڙي هڪ اسپتال ڏيکارين، دانش اسڪول جهڙو ڪو هڪ اسڪول ڏيکارين، انهن ماڻهن سرڪاري فنڊ به پنهنجي ذاتي تشهير جي لاءِ استعمال ڪيا. هن چيو ته ائين پهريون ڀيرو ڏٺو ويو ته اهي پنهنجي ليڊر کي ڇڏرائڻ آيا ۽ پاڻ بند ٿي ويا. هن چيو ته اسان انهن کي سمجهائيندا هئاسين ته نفرت ۽ انتقام جي سياست نه ڪن، اهو ٻج انهن پاڻ پوکيو آهي، فصل به اهي ئي لُڻندا. تڏهن به انهن کي چيو هو ته سنڀالي هلو پر انهن کي اسان جي ڳالهه سمجهه ۾ نه آئي هئي. اطلاعات واري وفاقي وزير ان موقعي تي هڪ شعر به پڙهيو.

مضمون کا ماخذ : کمپیوٹرائزڈ لاٹری

متعلقہ مضامین