ايس سي او سمٽ پاڪستان لاءِ گيم چينجر ثابت ٿيندي، خطي ۾ واپار ۽ امن کي هٿي وٺائڻ لاءِ پرعزم آهيون: عطاالله تارڙ

اسلام آباد -13 سيپٽمبر (اي پي پي) سڌ سماءَ، قومي ورثي ۽ ثقافت بابت وفاقي وزير عطاالله تارڙ چيو آهي، ته ايس سي او سمٽ پاڪستان لاءِ گيم چينجر ثابت ٿيندي، پاڪستان خطي ۾ واپار ۽ امن کي هٿي ڏيڻ لاءِ پرعزم آهي، ايس سي او سمٽ سان خطي ۾ گڏيل واپار ۽ امن لاءِ راهه هموار ٿيندي. انهن خيالن جو اظهار هن گذريل ڏينهن ايس سي او سمٽ جي تيارين جي حوالي سان پرڏيهي ميڊيا سان ڳالهائيندي ڪيو. وفاقي وزير چيو ته پاڪستان ايس سي او سربراهه ڪانفرنس جي اهم ايونٽ جي ميزباني ڪرڻ وڃي رهيو آهي، جيڪو اسان لاءِ اعزاز آهي. پاڪستان عالمي سطح تي اڀري رهيو آهي، تازو ئي ملائيشيا جي وزيراعظم انور ابراهيم پاڪستان جو دورو ڪيو جنهن دوران ٻه طرفن لاڳاپن، سيڙپڪاري ۽ ٻنهي ملڪن وچ ۾ سهڪار وڌائڻ تي ڳالهيون ٿيون. ملائيشيا جي وزيراعظم پاڪستان سان روانگي واپار وڌائڻ، چانور ۽ حلال گوشت جي امپورٽ جو به اعلان ڪيو. چانور، حلال گوشت سميت ٻين شين جي روانگي واپار سان ٻنهي ملڪن جا لاڳاپا وڌيڪ مضبوط ٿيندا. هن چيو ته ملائيشيا جي وزيراعظم جو دورو انتهائي ڪامياب رهيو، سندس دوري کان فوري پوءِ سعودي سيڙپڪاري واري وزير جي سربراهي ۾ 3 وفدن پاڪستان جو ڪامياب دورو ڪيو. وفاقي وزير چيو ته سعودي فرمانروا محمد بن سلمان پاڪستان سان واپار ۽ سيڙپڪاري واڌائڻ ۾ گهري دلچسپي ظاهر ڪئي آهي، سعودي عرب سان 2.2 ارب ڊالرن جي مفاهمتي يادداشتن تي صحيحيون به ٿيون. سعودي عرب جي وفد سان بي ٽو بي سيشنز ٿيا، واپار ۽ سيڙپڪاري وڌائڻ لاءِ معاهدن تي صحيحيون ٿيون. هن چيو ته سعودي عرب سان زراعت، معدنيات، انفارميشن ٽيڪنالاجي، لائيو اسٽاڪ، توانائي جي شعبن ۾ سهڪار وڌي رهيو آهي. وفاقي وزير ٻڌايو ته سعودي فاسٽ فوڊ چين البيڪ پاڪستان ۾ شروع ٿي رهي آهي، ان سلسلي ۾ مفاهمت جي يادداشت تي به صحيحيون ٿيون. وفاقي وزير چيو ته ويجهي ماضي ۾ ايران جي مرحوم صدر ڊاڪٽر ابراهيم رئيسي به پاڪستان جو دورو ڪيو هو. سندس دورو ايران سان لاڳاپن جي مضبوطي لاءِ انتهائي اهميت وارو هو. هن چيو ته پاڪستان ٻين ملڪن سان گڏ پنهنجي شراڪتداري کي تمام گهڻي اهميت ڏئي ٿو. اسان اڳ ئي چئي چڪا آهيون ته ڪنهن به ملڪ سان اسان جا لاڳاپا ڪنهن ٻئي ملڪ جي قيمت تي نٿا ٿي سگهن. هن چيو ته پاڪستان جي معيشت ترقي ڪري رهي آهي، گذريل پي ڊي ايم حڪومت دوران اسان ملڪ کي ڊفالٽ جي خطري کان بچايو، اسان جا معاشي اهڃاڻ بهتر ٿي رهيا آهن، مهانگائي جنهن جي شرح گذريل سال 32 سيڪڙو هئي، جيڪا گهٽجي 6.9 سيڪڙو تي آئي آهي، هلندڙ مالي سال جي پهرين ٽه ماهي دوران اوورسيز پاڪستانين طرفان 8.8 ارب ڊالرن جو پرڏيهه مان موڪليل مٽاسٽا وارو ناڻو هتي پهتو، اووسيز پاڪستانين جو معيشت جي بهتري ۾ اهم ڪردار آهي جنهن تي اسان سندن ٿورائتا آهيون، ان کان پهرين ايترو وڌيڪ پرڏيهي مٽاسٽا وارو ناڻو ڏيهه نه آيو. هن چيو ته اسان جي ايڪسپورٽ ۾ 14 سيڪڙو اضافو ٿيو آهي، واپاري خساري ۾ لاڳيتو گهٽتائي اچي رهي اهي، آءِ ٽي ايڪسپورٽ 3.2 ارب ڊالرن تائين پهچي وئي آهي. وفاقي وزير چيو ته اسان جي سمورن معاشي اهڃاڻن ۾ وڏي حد تائين بهتري آئي آهي، ڪنهن کي به اميد نه هئي ته مهانگائي 6.9 سيڪڙو تائين ايندي. هن چيو ته پاليسي ريٽ ۾ واضح گهٽتائي اچڻ سان معيشت کي سگهه ملي آهي. اسان چاهيون ٿا ته اسان جي واپار ۽ سيڙپڪاري ۾ اضافو ٿئي. هن چيو ته اسان جي پرڏيهي پاليسي ۽ معيشت ۾ بهتري آئي آهي، واپار ۽ سيڙپڪاري جي حوالي سان اسان آزاد پاليسي تي عمل پيرا آهيون. هن چيو ته چين جو وزيراعظم لي چيانگ پاڪستان جو دورو ڪري رهيو آهي. 11 سالن کان پوءِ ڪنهن چيني وزيراعظم جو اهو پهريون پاڪستان جو دورو هوندو، چيني وزيراعظم جو دورو پاڪستان ۾ سي پيڪ جي حوالي سان گيم چينجر ثابت ٿيندو. هن چيو ته سي پيڪ جي ٻئي مرحلي ۾ به سٺي اڳڀرائي ٿي رهي آهي، هن چيو ته چين جي وزيراعظم جي پاڪستان جي دوري دوران ٻه طرفيون ڳالهيون ٿينديون، ان کان علاوه پاڪ چين لاڳاپن جي سمورن رخن اقتصادي، واپاري لاڳاپن ۽ سي پيڪ تحت سهڪار تي جامع ڳالهيون ٿينديون. هن چيو ته چيني وزيراعظم جي دوري دوران وفدن جي سطح تي به ملاقاتون ٿينديون جن ۾ واپار سميت مختلف شعبن ۾ سهڪار تي ڳالهيون ٿينديون. وفاقي وزير عطاالله تارڙ چيو ته ايس سي او سربراه اجلاس منعقد ٿيڻ پاڪستان لاءِ اعزاز آهي، ايس سي او سربراهه اجلاس جي سلسلي ۾ وفاقي گادي واري هنڌ اسلام آباد کي خوبصورتي سان سجايو ويو آهي ۽ پاڪستان جي ثقافت کي پيش ڪرڻ جي ڪوشش ڪئي وئي آهي. هن چيو ته ايس سي او سربراهه ڪانفرنس پاڪستان لاءِ گيم چينجر ثابت ٿيندي. ايس سي او علائقائي سهڪار جي حوالي سان اهم فورم آهي جنهن ۾ علائقائي مسئلن ۽ چيلينجز تي ڳالهيون ٿينديون. ايس سي او سربراهه ڪانفرنس سان علائقائي چئلينجز تي ضاطو آڻڻ ۾ مدد ملندي، ريجنل ڪنيڪٽيويٽي، علائقائي مسئلن جي حل، معيشت ۽ ثقافت کي هٿي ملندي. وفاقي وزير چيو ته ڊگهي عرصي کان پوءِ پاڪستان ايس سي او جي ميزباني ڪري رهيو آهي، ان حوالي سان انتظامن کي حتمي شڪل ڏني وئي آهي، فول پروف سيڪيورٽي انتظام ڪيا ويا آهن. هن چيو ته ايس سي او سمٽ جي سائيڊ لائين تي مختلف ملڪن جي سربراهن جون ٻه طرفيون ملاقاتون به ٿينديون. هن چيو ته پاڪستان خطي ۾ واپار ۽ امن کي هٿي ڏيڻ لاءِ پرعزم آهي، ايس سي او سمٽ سان خطي ۾ گڏيل واپار ۽ امن لاءِ راهه هموار ٿيندي.

مضمون کا ماخذ : اسرار ریلز

متعلقہ مضامین