کراچی۔24اپریل(اے پی پی) وزیراعظم محمد شہباز شریف معاشی استحکام سانڳے وفاق اتے صوبیں وچال نیڑے تعلق اتے ہم آہنگی دی اہمیت ݙسیندے ہوئیں آکھیے جو عوام دے مسئلیں دے حل، ملک دی خدمت، صوبیں دی ترقی و خوشحالی سانڳے رل تے ک کرݨا اے ۔ کہیں وی صوبے تے عوام دی ترقی پاکستان دی ترقی اے، ایں ویلھے ساریں توں وݙا مسئلہ معاشی استحکام دا اے ،سعودی اتے ایرانی قیادت دے دوریں نال سرمایہ کاری اچ ودھارا تھیسی ۔ اے ڳالھ انہاں سندھ کابینہ دے ارکان کوں آکھی اے ۔ ایں موقع تے وزیر اعلیٰ سندھ سیّد مراد علی شاہ، وفاقی وزیر منصوبہ بندی و ترقی احسن اقبال، وفاقی وزیر خزانہ محمد اورنگزیب، وفاقی وزیر اطلاعات و نشریات عطا اللہ تارڑ، وفاقی وزیر پاور ڈویژن اویس احمد خان لغاری، وفاقی وزیر تعلیم ڈاکٹر خالد مقبول صدیقی، وفاقی وزیر پٹرولیم ڈاکٹر مصدق ملک، وفاقی وزیر تجارت جام کمال خان، سندھ کابینہ دے ارکان تے ٻئے اعلیٰ افسران موجود ہن۔ وزیراعظم شہباز شریف آکھیے 8 فروری دے انتخابات دے نتیجے اچ اساکوں مینڈیٹ ملیے اساکوں ایں مینڈیٹ دا احترام کریندے ہوئیں رل تے ملک دی خدمت ، صوبیں دی ترقی و خوشحالی سانڳے کم کرݨا اے تاں جو عوام دے مسئلے حل کرسڳدوں ۔ معاشی استحکام سانڳے وفاق اتے صوبیں کوں نیڑے تعلق بݨاوݨا پوسی ۔ وزیر اعلیٰ سندھ نال نیڑے رابطہ اے ، وفاقی اتے صوبائی وزرا وی ھک ݙوجھے نال تعلق استوار رکھن، سندھ دی ترقی پاکستان دی ترقی اے، پنجاب دی ترقی پاکستان دی ترقی اے، ایویں ٻئے صوبیں دی ترقی وی پاکستان دی ترقی اے ۔ وزیراعظم آکھیے میݙی کوشش اے ایں تعلق کوں تکڑا بݨاؤں ، کہیں ویلھے اساکوں ایجھے فیصلے وی کرݨے پوسن جیڑھے شاہد بھاویں اساں آپݨے سانڳے پسند نہ کریندے ہووں لیکن ملک دے عوام تے صوبیں دی ترقی تے خوشحالی سانڳے کرݨے پوسن تاں جو جمہوریت تے ترقی دی گاݙی اڳوں ٹرے وزیراعظم آکھیے سعودی اتے ایرانی وفد پاکستان دا دورہ کیتے، ایران دے صدر کراچی وی آئن، ایویں اڳوں وی امید اے جو سرمایہ کاری سانڳے وفد پاکستان دا دورہ کریسن تے چارے صوبیں اچ موجود سرمایہ کاری دے موقع توں فیدہ چیسن لیکن اے اوں ویلھے ممکن اے جݙاں اساں آپݨا ہوم ورک کروں آپت اچ جڑت ہووے تے پوری تیار تے سوچ نال اڳوں ودھوں تاں مثبت نتیجے سامݨے آسن اساں ملک دے عوام سانڳے ٹیم بݨ تے کم کریسوں ایں توں انڄ اساں کنے کوئی رستہ کائنی ۔ ایں موقع تے وزیراعلیٰ سندھ سیّد مراد علی شاہ وزیراعظم شہباز شریف کوں انہاں دے ول وزیراعظم منتخب تھیوݨ تے مبارخ ݙتی تے آکھیے جو 2022 اچ معاشی استحکام سانڳے رل تے کم شروع کیتا ہئی ایں جذبے نال اڳوں ودھسوں ۔ سندھ دی صوبائی حکومت وفاق نال رل تے عوام دی توقعات تے پوری لہسی۔
