پاکستان افغانستان اچ کہیں مخصوص گروپ دی حمایت نی کریندا پیا ، افغانستان اچ جیڑھی وی حکومت بݨسی پاکستان اوندے نال کم کریسی ، وزیر اعظم عمران خان دی غیر ملکی میڈیا دے نمائندیں نال ڳال مہاڑ

اسلام آباد۔12اگست (اے پی پی):وزیر اعظم عمران خان آکھیے جو پاکستان افغانستان اچ کہیں مخصوص گروپ دی حمایت نی کریندا پیا۔ موجودہ حالات اچ افغانستان اچ سیاسی مفاہمت اوکھی لڳدی پئی اے ، افغانستان اچ جیڑھی وی حکومت بݨسی پاکستان اوندے نال کم کریسی ، افغانستان اچ ممکنہ طویل خانہ جنگی دی صورت اچ افغانستان دے بعد ݙوجھا ساریں توں ودھ متاثر تھیوݨ آلا ملک پاکستان ہوسی ، واضح کرݙتے جو پاکستان فوجی اݙیں دی اجازت نہ ݙیسی ، نیسے چاہندے جو اساݙی سرزمین افغانستان اچ حملیں کیتے استعمال تھیوے، افغان حکومت ہر طرح دی حکومتی اتے انتظامی خرابیاں دا الزام پاکستان تے لیندی پئی اے ، امریکہ دی کوشش رہی اے جو طالبان اتے افغان حکومت کہیں معاہدے تے پڄ ونڄے ۔ وزیراعظم اے ڳال غیر ملکی میڈیا دے نمائندیں نال ڳال مہاڑ کریندے ہوئیں آکھی اے ۔ افغانستان دی صورتحال بارے ھک سوال دے ولدے اچ وزیراعظم عمران خان آکھیے جو اساکوں امید ہئی جو افغانستان دے مسئلے دا کوئی سیاسی حل نکل آسی لیکن ایں ویلھے ایجھا ٻہوں اوکھا نظردا پئے ، ایں اوکھا ایں سانگے ہے جو طالبان انکار کر ‎یندے پئن ، طالبان دی سینئر قیادت پاکستان آئی ہئی اتے اساں انہاں کوں مناوݨ دی کوشش کیتی جو او کہیں سیاسی حل دے پاسے ودھن ، انہاں آکھیے جو سیاسی حل ہی افغانستاں کوں انتشار دے پاسوں روک سڳدے ، بدقسمتی نال جݙاں طالبان اتھاں آئے تاں انہاں اشرف غنی نال مذاکرات توں انکار کرݙتا ، انہاں دی شرط یہ ہے جو جݙاں تئیں اشرف غنی اقتدار وچ ہن تاں او افغان حکومت نال ڳال مہاڑ نہ کریسن ۔ وزیر اعظم آکھیے جو 2019 اچ جݙاں پاکستان طالبان کوں امریکہ نال ڳال مہاڑ تے راضی کیتا تاں میں تجویز پیش کیتی ہئی جو انتخابات توں پہلے اتھاں ھک عبوری حکومت ہووݨی چاہیدی اے تاں جو انتخابات اچ سارے فریقین شامل ہوون، افغان حکومت عبوری حکومت دے خیال کوں تنقید دا نشانہ بݨایا، انہاں انتخابات کرائے اتے صدر اشرف غنی منتخب تھی ڳئے ۔ انہاں آکھیے جݙاں اشرف غنی صدر منتخب تھی ڳئن تاں طالبان ایں عمل اچ شریک نہ تھئے ، اشرف غنی اصرار کیتا جو طالبان انہاں نال ڳال کرن تے طالبان نہ ہی انہاں کوں تے نہ انتخابات کوں منیا ، طالبان افغان حکومت نال مذاکرات توں انکار کرݙتا تے اینویں ایں مسئلے جنم ڳھدا تے اے مسئلہ ہݨ وی جوں دا توں اے ۔ وزیر اعظم آکھیے جو افغان حکومت سمجھدی اے جو اساݙے کنے کوئی جادوئی طاقت اے جو اساں جیویں چاہسوں اوندے تے طالبان کوں راضی کرگھنسوں ،جݙاں امریکیاں اپݨے فوجی واپس بھیجݨ شروع کرݙتے تے خاص کر جݙاں انہاں انخلاء دی تاریخ دا اعلان کیتا تاں اوندے بعد طالبان تے اساݙا اثر و رسوخ گھٹ تھی ڳیا کیوں جو طالبان سمجھیے جو انہاں جنگ جت ڳھدی اے ، انہاں آکھیے جو اساں سمجھدوں جو افغانستان اچ ممکنہ طویل خانہ جنگی دی صورت اچ افغانستان دے بعد ݙوجھا ساریں توں ودھ متاثر تھیوݨ آلا ملک پاکستان ہوسی ، پہلی وجہ ایہا اے جو افغانستان توں ودھ پختون پاکستان وچ ہن ، طالبان بنیادی طور تے پختوناں دی تحریک اے تے ایندے اثرات پاکستانی علاقیں اچ آسن ، 2003 اتے 2004 دے بعد اینویں تھی ڳئے جو ساݙے پختوں علاقیں اچ افغانستان دی صورت حال دے نتیجے اچ رد عمل آیا اتے پاکستان کوں 70 ہزار جاناں دا ضیان چاوݨا پیا کیوں جو اساں امریکہ دی حمایت کیتی ہئی ۔ انہاں آکھیے ایں ڳال دا امکان اے جو اساݙے پختوں علاقیں اچ ول مسئلے تھیسن ، ستر ہزار جاناں تےمعیشت کوں 100ارب ڈالر توں ودھ ضیان دے نال اساݙے قبائلی علاقیں توں 30 لکھ لوکاں کوں آپݨے گھراں کوں چھوڑ ݙیوݨا پیا ، اے پہلی پریشانی اے، ݙوجھی پریشانی پناہ گزیناں دی ہے، اساں کنے پہلے ہی 30 لکھ رجسٹرڈ افغان پناہ گزین موجود ہن، اساݙی معیشت درست پاسے ٹردی پئی اے تے اساں اینویں ہرگزنہ چاہسوں جو مزید پناہ گزین پاکستان آون تے تریجھی ڳال اے ہے جو اساں افغانستان دے رستے وسط ایشیاء دے نال رابطیں دے عظیم منصوبے بݨائن۔ وزیر اعظم آکھیے جو ازبکستان توں افغانستان اچ مزار شریف دے رستے پاکستان تئیں ریلوے لائن منصوبے دے سلسلے اچ ہݨے ہی تاشقند ڳیا ہم تے جیڑھی جو ایں خطے کوں آپت اچ رلیسی ، افغانستان اچ خانہ جنگی دی صورت اچ وسط ایشیاء نال رابطے تے مبنی اساݙا معاشی ایجنڈا پس پشت چلیا ویسی ، انہاں آکھیے جو پاکستان افغان عوام ولوں نامزد یا منتخب کیتی ڳئی کہیں وی حکومت دے نال کم کرݨ سانگے تیار اے ، افغان عوام جیں حکومت کوں وی آپݨا نمائندہ سمجھسن پاکستان اوندے نال رل تے کم کرݨ سانگے تیار اے ۔ افغانستان تے طالبان دے کنٹرول دے حوالے نال ھک سوال دے ولدے اچ وزیراعظم آکھیے جو طالبان دے کنٹرول دا انحصار ایندی نوعیت تے ہے، جے طالبان دے کنٹرول اچ سارے فریق شامل تھئے تاں اے افغانستاں کیتے بہترین آپشن اے، جے اے ساریں دی نمائندہ حکومت اے لیکن جے اے کہیں ھک فریق دی حکومت اے تاں سارے افغانستان اچ جنت تھیندی پئی ہووے تے اساں سمجھدوں جے طالبان فوجی قبضے دے نتیجے اچ اپݨی حکومت قائم کرگھندن تاں ایندے توں مراد طویل خانہ جنگی اے۔وزیراعظم عمران خان آکھیا جو نوے دے ݙھاکے اچ پاکستان اچ پالیسی سازی اچ میݙا کردار ہوندا تاں میں تذویراتی گہرائی دے تصور دے حوصلہ افزائی نہ کریندا جیڑھے جو ایں ویلھے پاکستان دی پالیسی ہئی، اے ڳالھی خاصی قابل فہم اے جو پاکستان کوں مشرقی سرحد تے آپݨے توں ست گناہ وݙا بھارت جیھا جارحانہ عزائم رکھݨ آلا ہمسائے دا سامݨا اے اتے پاکستان دے سکیورٹی اداریاں کوں مشرق اتے مغرب اچ ݙوہیں محاذاں تے جارحیت پاروں پریشانی ہئی۔ ایں کیتے کوشش کیتی ڳئی جو افغانستان اچ پاکستان دی حامی حکومت اقتدار اچ آوے۔ انہاں آکھیا جو افغانستان اچ جیڑھی وی حکومت اقتدار اچ امسی اونکوں پاکستان نال رل تے کم کرݨا پمسی اتے پاکستان کوں اوں ہر حکومت نال رل تے کم کرݨا چاہیدے جئیں کوں افغان عوام چݨسن۔ افغانستان دے لوک صرف اوں حکومت دی حمایت کریسن جیڑھی جو انہاں دی نمائندہ ہووے اتے جیڑھی انہاں دے فائدے دی ڳالھ کرے۔ ایں سانڳے جݙاں توں میݙی حکومت اے میݙی اے پالیسی اے جو اساں سارے افغان فریقین، پاکستان مخالف سمجھی ونجݨ آلے شمالی اتحاد نال ڳالھ کیتی، میں حامد کرزئی نال وی ڳالھ کیتی۔ میں عبداللہ عبداللہ کوں دعوت ݙتی۔ انہاں نال ڳالھ کیتی۔ اساں انہاں کوں اے ݙساوݨ دی کوشش کیتی اے جو افغانستان اچ اساݙا کوئی پسندیدہ کائنی۔ افغانستان اچ جیڑھی وی حکومت بݨسی پاکستان اوں نال کم کریسی۔ اساں اتھاں سارے فریقین تے مشتمل حکومت دے حامی ہیسے، اگر اتھاں بے چینی ہوسی تاں پاکستان متاثر تھیسی۔ پاکستان کوں امریکہ دی جنگ اچ رلاوݨ تے ستر ہزاراں جاناں توں ہتھ دھو ٻیٹھوں۔ پرانی جہادی تنظیماں سوویت یونین دے خلاف جہاد سانڳے بݨائی ڳئی ہئی او ساری پاکستان دے خلاف تھی ڳئی کیونجو پاستان انہاں کوں اے ݙساوݨ دی کوشش کیتی اے جو سوویت یونین دے قبضے دے خلاف جنگ جہاد ہئی جڈانجو امریکی قبضے دے خلاف جنگ دہشت گردی اے تاں او پاکستان دے خلاف تھی ڳئے۔ وزیراعظم آکھیا جو پاکستان دے قبائلی علاقیاں اچ خانہ جنگی جیھی صورت حال ہئی کیونجو اساں امریکہ دا ساتھ ݙیندے پئے ہاسے، بنیادی طور تے اساں ہمدردیاں پختوناں اتے نہ طالبان نال ہن۔ وزیراعظم آکھیا جو اساں اے ڳالھ نشابر کر ݙتی اے جو اساں آپݨی سرزمین استعمال کائنا کرݨ ݙیسوں کیونجو ایں نہ تھیوے جو ہک واری ولا افغانستان دی خانہ جنگی اچ گھیلیا ونڄے۔ اساں نی چاہندے جو اساں ݙے اݙے بݨݨ اتے اساں اے وی نی چاہندے جو اساݙے زمین افغانستان اچ حملیاں سانڳے استعمال تھیوے۔ ہک سوال دے جواب اچ انہاں آکھیا جو پاکستان اتے امریکہ دے سربراہواں وچال اڄاں تئیں کوئی رابطہ کائنی تھیا۔ وزیراعظم آکھیا جو جلد بازی نال امریکی افغانستان توں واپس آڳئن۔ میں جیھے لوک یکا آکھدے رہین جو ایں مسئلے دا کوئی فوجی حل کائنی، ایں دا سیاسی حل ہووݨا چاہیدے، میکوں امریکہ مخالف آکھیا ڳیا اتے میکوں طالبان خان تک آکھیا ڳیا۔ پہلی واری افغان حکومت امریکہ تے الزام لیندی پئی اے جئیں انداز نال او افغانستان توں واپس آڳئن اتے ݙوجھی ڳالھ اے جو صدر بائیڈن میکوں فون نہ کیتا تاں اے انہاں دی مرضی اے او کال کرن یا نہ کرن اتے او ایں کوں ضروری سمجھدن یا نی اتے نہ ای میں کہیں فون کال دے انتظار اچ ٻیٹھاں اے انہاں دی مرضی اے۔ ہک بئے سوال دے جواب اچ وزیراعظم آکھیا جو میݙا خیال اے جو امریکہ اے فیصلہ کرݨے جو بھارت ایندا تذویراتی اتحادی اے اتے پاکستان توں مختلف سلوک کرݨ دی وی ایہو وجہ اے اتے او اے وی سمجھدن جو اساں چین دے ٻہوں نیڑے ہیسے اتے او چین کوں انڄ کرݨ چاہندن۔ جینویں امریکا پاکستان نال سلوک رکھیے ایں اچ امریکہ دی وسیع تر تذویراتی پالیسی دی جھلک نظردی اے۔ پاکستان کوں صرف افغانستان اچ امریکہ ولوں چھوڑی ڳئی ابتر صورتحال درست کرݨ سانڳے اہم سمجھیا ڳیا جڈانجو او 20 سال تئیں ہک فوجی حل دی ڳول اچ ہن جݙانجو ایجھا کوئی حل موجود کائنی۔ انہاں آکھیا جو چین ہک سپر پاور دے طور تے ابھردا پئے اتے پاکستان سانڳے چین دی ٻہوں اہمیت اے کیونجو چین ٻہوں اوکھے ویلھے پاکستان دی مدد کیتی اے اتے اساں چین دا شکریہ ادا کریندوں۔ اے کوئی مخصوص معاملہ کائنی۔ اساں سی پیک اچ رلݨ سانڳے ݙوجھے ملکاں اتے یورپی ملکاں کوں وی دعوت ݙتی اے اتے ایں اچ کوئی وی ملک شامل تھی سڳدے۔ ایں ویلھے پاکستان کوں ساریاں توں ودھ احساس آپݨی معیشت دا اے، اساݙی 22 کروڑ آبادی اے اتے میݙا ساریاں توں اہم ہدف لوکاں دی فلاح و بہبود اتے انہاں کوں غربت توں کݙھݨ اے۔ وزیراعظم افغانستان اچ چین دے کردار بارے سوال دا جواب ݙیندیں ہوئیں آکھیا جو چین افغانستان دا ہمسایہ اے اتے یقینی طور افغانستان دی نویں سروں تعمیر اچ چین دا کردار ہوسی۔ انہاں آکھیا جو میں ترکی دے وزیردفاع نال ملاقات کیتی اے ،ترکی اتے طالبان سانڳے سوھݨی ڳالھ اے جو او رل تے ٻہہ کراہیں ڳالھ کرن تانجو او ڳالھ مہاڑ کر سڳن۔ اساں وی طالبان نال ڳالھ کریسوں تانجو اساں وی ایں بارے آپݨا کردار نبھا سڳوں۔

مضمون کا ماخذ : loteria com prêmio acumulado

متعلقہ مضامین